أيمن نور هذا الأسم الذي يردد بصفة يومية في الصحافة المصرية ، أحد أكثر الشخصيات المثيرة للجدل في الشارع السياسي المصري ربما لأنه وصيف انتخابات الرئاسة السابقة أو لأنه صوت الليبرالية في مصر أو حتى لعلاقاته بالأدارة الأمريكية.
نائر: شوفت يا نئير ،منعوا أيمن نور من السفر لأمريكا حرام القمع ده!!
نئير: قمع أيه ؟ واحد خارج من السجن بأفراج صحي مش من حقه قانوناً السفر للخارج إلا في حالة العلاج و ده حتى أنتهاء فترة عقوبته ، القانون واضح يا سيد .
نائر: انته عارف أن النظام حاطه في دماغه و هوه اللي عمل فيه كل ده ، و بعدين ده قال أنه رايح يقابل المصريين هناك .
نئير: الراجل ده مش بيلنك معايا خالص ، و مصريين ايه اللى البيه رايح يقابلهم بصفته أيه ؟؟ ده رايح يشوه صورة مصر بره و يقابل أسياده في أمريكا و ياخد التعليمات منهم ، و بعدين قضيته ثابتة عليه و بأعتراف شركاءه في التزوير و قضى عقوبة سجن عادية جداً و حتى طلع قبل معاده.
نائر: يعني المفروض يموت جوه السجن عشان ترتاح ، الراجل حالته الصحية كانت سيئة و خرج بحكم قضائي.
نئير: ههههههههههههه، ضحكتني و أنا مش عاوز أضحك، ده من أول ما طلع و هوه كل يوم على قناة و مسمعناش يعني أنه دخل مستشفى ولا حاجة .
نائر: صحته جت على الهوا اللى بره فيها أيه يعني ؟
نئير: أنا مش عارف أنته بدافع عنه ليه بس ؟؟
نائر: و ما دافعش عنه ليه ؟؟ الراجل معارض مصري و بيحارب الحكومة و الفساد وكمان انته بتتكلم عن وصيف الرئيس .
نئير: صلاة النبي أحسن ، هوه أي واحد بيعاض الحكومة نأيده حتى لو كان أسوء منها .
نائر: أسوء منها ؟؟!! ، يا راجل هوه في أسوء من حكومتنا ؟؟!!!
نئير: أولاً :من ناحية الدماغ اللى الأتنين واحد، الحزب الوطني و أيمن نور الأتنين نفس الفكر الليبرالي وثانياً: الأسوء في ايمن نور أنه عميل واضح لأمريكا و على أتصال بالأدارة الأمريكية فاكر لما بوش طلب أنه يخرج من السجن و الحكومة الحمد لله رفضت لمرة أن حد يتدخل في شئوننا الداخلية و الخطاب اللى بعته لأوباما أول ما مسك لأثبا ت ولاءه .
نائر: ليبرالي أيه الكلام الكبير ده ، و بعدين طبيعي أمريكا تدافع عنه لأنها بتدافع عن فكرها مش عن شخصه .
نئير: لو يا أخي ، أحنا بنتقرف من الحكومة لما بتنفذ الضغوط الخارجية في بعض المشاكل ، نقوم نجيب واحد أجندته كلها جايبها من بره .
نائر: أنته بتتكلم كأنه حيمسك الحكم بكرة !!، كفاية أن الراجل عامل حراك سياسي في البلد .
نئير: حراك أيه ؟؟؟ كل اللى قدمه أيمن نور شو أعلامي مش أكتر ، و بعدين وصيف رئاسة أيه يا أبو وصيف اللى عمال تقولها ؟؟ ده الريس فاز بنسبة 88.6% يعني الوصيف بتاعك معاه ملاحق خليه يحسن مجموعه و بعدين نتكلم .
نائر: خلاص قفلوها في وشه و بعدين لولاه لكان الريس فاز بنتيجة 99.99%.
نئير: بس يا عم ده واحد كل همه أنه الظهور ، فاكر عمل شو قد أيه و طلع في برامج عشان مراته طلبت الطلاق منه !!، بلاش تفاهة .
نائر:ده دليل أن الناس بتحبه و عاوزه تعرف أخباره .
نئير: أحنا بنحب أي حاجة نتكلم فيها و خلاص حتى لو تافهة و بعدين ده راجل فاشل عنده مشاكل حتى في حزب الغد و مشاكل مع حركة كفاية و الحملة ضد التوريث عشان أتصالاته بأمريكا.
نائر: مفيش فايدة مش حنتفق .
نئير: و أيه الجديد؟؟ و كفاية عشان أنا أتخنقك منك و منه .
نائر: و أنا كمان.
شاركنا برأيك حول شخصية أيمن نور
عماد عاصم |
