نائر: نظام الامتحانات فاشل
نئير: أنت بتبدأ الكلام كده ليه؟
نائر: لأنه فاشل
نئير: لأ مش فاشل .. أنا شايفه معقول جدا
نائر: أنت دايماً كده .. متفائل لدرجة بتخليك مش بتشوف الغلط.

نئير: وأنت متشائم لدرجة بتخليك بتشوف كل حاجة غلط.

نائر: لأ يا نئير أنا مش متشائم بس دي الحقيقة .. كل سنة نلاقي لخبطة وارتجال من أول جدول الامتحانات و ورق الامتحان ولجان الامتحان ومكان الامتحان و...

نئير: حيلك .. حيلك .. إيه كل السواد اللي جواك ده .. أنا شايف إن إدارة الامتحانات في الجامعة كويسة جداً .. ومليش تعليق على كل ده.

نائر: ليه أنت مشفتش اللي حصل في كلية تجارة .. نزلوا جدول الامتحانات وبعدين شالهو ونزلوا واحد تاني قبل الامتحانات بكام يوم

نئير: أنت بتتكلم عن كلية واحدة بس حصل فيها كده.

نائر: أنا بتكلم عن سيستم .. عن نظام .. ليه جداول الامتحانات متبقاش محددة قبل الامتحانات بقترة طويلة .. زي مبارايات الدوري مثلاً يا أخي .. ولا بلاش دي .. يعني أنت بيعجبك الهيصة والدوشة اللي بتحصل جوة كل لجنة وفلان بيزعق وفلان رايح وفلان جاي ..

بيعجبك توزيع أوراق الامتحانات متأخر ..

بيعجبك الغلطات الإملائية أو في وضع الأسئلة اللي بتتصحح في آخر 10 دقايق في الامتحان ..

بيعجبك الامتحانات التعجيزية .. أو الأسئلة التعجيزية .. اللي محدش يعرف يحلها .. ويرجعوا يقولوا حنلغي السؤال الفلاني .. حنضم درجة السؤال الفلاني على درجة السؤال العلاني..

بيعجبك تأخير النتايج لأجل غير مسمى ..

نئير: أنا شايف إن دي حاجات عادية .. وأخطاء فردية .. مممكن تحصل في أي مكان

نائر:أخطاء فردية؟؟!!!! .. حرام عليك .. دي أمور بتحصل بقالها عشرات السنين .. من ساعة ما ما واعينا على الدنيا

نئير: يا سيدي بكرة الدنيا تتغيير .. مش في وزير تعليم جديد .. بكرة يحصل الجديد

نائر: آه طبعاً أنت حتقولي؟!! .. السيد/ أحمد زكي بدر .. أول من استخدم البلطجية في الجامعة .. الامتحانات بعد كده حتبقى بالمطاوي

نئير: يا أخي بطل النظرة السوداوية دي

نائر: ربنا يستر على التعليم وعلى البلد كلها

خالد عمر